အသင်းဝင်ရန်

၁ မည်သူများ ဝင်ခွင့်ရှိသနည်း

အောက်ပါအရည်အချင်းများနှင့် ပြည့်စုံ၍ အသင်း၏ ဖွဲ့စည်းပုံအခြေခံစည်းမျဉ်းပါ သတ်မှတ်ချက်များနှင့် ကိုက်ညီသော ဂီတထုတ်လုပ်သူများကို လူမျိုး၊ ကိုးကွယ်သည့်ဘာသာ၊ အမျိုးသား၊ အမျိုးသမီး အဆင့်အတန်းခွဲခြားခြင်းမရှိဘဲ မိမိဆန္ဒအလျောက် ဝင်ခွင့်ရှိပါသည် —

1. က ပြည်ထောင်စုမြန်မာနိုင်ငံသားဖြစ်ပြီး အသက် ၁၈ နှစ် ပြည့်ပြီးသူ ဖြစ်ရမည်။
2. ခ နိုင်ငံတော်မှ သတ်မှတ်ပြဌာန်းထားသော တေးထုတ်လုပ်ရေးလုပ်ငန်းလိုင်စင်ရှိသူများနှင့် လိုင်စင် မရှိသော်လည်း မိမိတို့သီချင်းများအား ကိုယ်တိုင်တေးသီချင်းထုတ်လုပ်သူ အကျုံးဝင်သော မည်သူမဆို အသင်းသားအဖြစ် ပါဝင်ပိုင်ခွင့်ရှိသည်။
3. ဂ အသင်း၏ ဖွဲ့စည်းပုံစည်းမျဉ်းများကို မိမိကိုယ်တိုင် သိရှိနားလည်၍ အသင်းတွင် ချမှတ်ထားသော စည်းမျဉ်းစည်းကမ်းများကို လိုက်နာမည့်သူ ဖြစ်ရမည်။
4. ဃ အသင်းဝင်လိုသော အသင်းဝင်အသစ်များသည် အသင်းတွင် လိုအပ်သလို လျှောက်ထားနိုင်သည်။ မိမိထုတ်လုပ်စီစဉ်ဖူးသော အထောက်အထားများ၊ လုပ်ငန်းလိုင်စင်များကို လိုအပ်ပါက အသင်းသို့ တင်ပြနိုင်ရမည်။

၂ လျှောက်ထားနည်း

1. က သတ်မှတ်ထားသော အသင်းဝင်ခွင့်အဆိုပြုလွှာပုံစံကို ပြည့်စွက်ရေးသား၍ မြန်မာနိုင်ငံတေးသီချင်းမူပိုင်ထုတ်လုပ်သူများအသင်း (MMCO) သို့ တိုက်ရိုက်ဆက်သွယ်နိုင်သည်။
2. ခ တင်သွင်းလာသော အဆိုပြုလွှာပုံစံကို MMCO မှ စိစစ်၍ ဘုတ်အဖွဲ့မှ လက်ခံပါက သတ်မှတ်ထားသော ဝင်ကြေးများကို ပေးသွင်းရမည်ဖြစ်ပြီး ဝင်ကြေးပေးသွင်း ရမည့်နေ့မှစ၍ အသင်းဝင်အဖြစ် သတ်မှတ်သည်။

လျှောက်လွှာပုံစံကို MMCO ရုံးမှ တိုက်ရိုက်ရယူနိုင်ပါသည်။ ဖုန်းဖြင့် ဆက်သွယ်၍ စုံစမ်းနိုင်ပါသည်။

၃ အသင်းဝင် အမျိုးအစားများ

1. က ဂီတလောကတွင် ဂီတထုတ်လုပ်ဖြန့်ချိရေးလုပ်ငန်း လိုင်စင်သက်တမ်းရှိလျှင်သော်လည်းကောင်း၊ ကျော်ကြားမှုရှိသူများကိုသော်လည်းကောင်း အသင်း၏ မွေးဝမ်းကျောင်းအဆင့် အသင်းဝင်အဖြစ် သတ်မှတ်သည်။
2. ခ အပိုဒ် (က) ပါ အသက်မွေးဝမ်းကျောင်းအဆင့် မဟုတ်စေကာမူ ဝါသနာအရ တေးသီချင်းများ စီစဉ်သူအဖြစ်လည်းကောင်း၊ ဂီတထုတ်လုပ်ဖြန့်ချိသူ၊ ငှားရမ်းသူ၊ ကူးယူသူလုပ်ငန်းရှင်အဖြစ်လည်းကောင်း ဆောင်ရွက်နေသူများအား အသင်းဝင် (ဝါသနာရှင်) အဖြစ် သတ်မှတ်သည်။

၄ အသင်းဝင်များ၏ ခံစားခွင့်

1. က မိမိတက်ရောက်ခွင့်ရှိသော ညီလာခံအစည်းအဝေးနှင့် ဆွေးနွေးခွင့်၊ မဲဆန္ဒပိုင်ခွင့်၊ အဆိုတင်သွင်းခွင့်နှင့် အသင်း၏ စည်းမျဉ်းအရ သတ်မှတ်ထားသော အခြားအခွင့်အရေးများကို ခံစားခွင့်ရှိသည်။
2. ခ အသင်း၏ လုပ်ငန်းဆောင်မြင့်ရေးအတွက် အကြံပြုချက်များ၊ ဝေဖန်ချက်များ၊ အဆိုပြုချက်များ၊ နစ်နာချက်များ၊ မကျေနပ်ချက်များကို အသင်းထံသို့ တိုက်ရိုက်သော်လည်းကောင်း၊ အခြေခံနည်းလမ်းဖြင့်သော်လည်းကောင်း အဆင့်ဆင့်တင်ပြပိုင်ခွင့် ရှိသည်။
3. ဂ မိမိအားပေးအပ်သောတာဝန်နှင့် အစည်းအဝေးပွဲများကို မိမိကိုယ်တိုင်တက်ရောက်၍ စည်းကမ်းနှင့်အညီ ရှင်းလင်းပြောဆိုပိုင်ခွင့် ရှိသည်။
4. ဃ အသင်းကပေးအပ်သော အခွင့်အရေးများကို အခါအားလျော်စွာ ခံစားခွင့်ရှိသည်။
5. င အသင်းဝင်တိုင်းသည် မိမိယုံကြည်သောဘာသာကို လွတ်လပ်စွာ ကိုးကွယ်ပိုင်ခွင့်ရှိသည်။

၅ အသင်းဝင်များ လိုက်နာရမည့် စည်းကမ်းများ

1. က ပြည်ထောင်စုသမ္မတမြန်မာနိုင်ငံတော်ကပြဌာန်းထားသော တရားဥပဒေကို လေးစားလိုက်နာရမည်။
2. ခ အသင်း၏ စည်းမျဉ်းများပါ ရည်ရွယ်ချက်၊ လုပ်ငန်းစဉ်၊ လုပ်ထုံးလုပ်နည်းညွှန်ကြားချက်များကို တိကျစွာ လိုက်နာဆောင်ရွက်ရမည်။
3. ဂ အလားတူ MMCO ၏ ရည်ရွယ်ချက်နှင့် လုပ်ငန်းစဉ်များ အကောင်အထည်ဖော်ရေးအတွက် အစွမ်းကုန်ကြိုးစား ဆောင်ရွက်ရမည်။
4. ဃ မိမိပါဝင်သည့် အဖွဲ့အစည်း၏ လျှို့ဝှက်ချက်များနှင့် အဖွဲ့အစည်းအတွင်း အချေအတင် ဆွေးနွေးချက်များ၊ အပြန်အလှန်ဆောင်ရွက်ချက်များနှင့်ပတ်သက်၍ ယခုအသင်းကြီး၏ ပြင်ပသို့ မပေါက်ကြားအောင် စောင့်ထိန်းကြရမည်။
5. င အသင်းသားအချင်းချင်း ချစ်ကြည်ရင်းနှီးကြ၍ စည်းလုံးညီညွတ်ခြင်းနှင့် အသင်း၏ ဂုဏ်သိက္ခာ တိုးတက်ရေးတို့အတွက် အစဉ်ကြိုးပမ်းနေကြရမည်။
6. စ အသင်းအတွင်း ဂိုဏ်းခွဲခြင်း၊ အုပ်စုဖွဲ့ခြင်း စသည့် အသင်း၏ အကျိုးပျက်စီးရာ ပျက်စီးကြောင်းကို မည်သည့်နည်းနှင့်မျှ ကြံစည်လုပ်ဆောင်ခြင်း မပြုရ။ လုပ်ဆောင်ပါက အသင်းဝင်အဖြစ်မှ ထုတ်ပယ်သည်အထိ အရေးယူခံရမည်။
7. ဆ နှစ်စဉ်ကြေးကို မှန်မှန်ပေးသွင်းရမည် ဖြစ်သည်။
8. ဇ အသင်း၏ လှုပ်ရှားမှုတွင် မည်သည့်နိုင်ငံရေးအဖွဲ့အစည်း၏ လှုပ်ရှားမှုနှင့်မျှ သြဇာသက်ရောက်မှုမရှိစေဘဲ ကင်းရှင်းစေရမည်။
9. ဈ မိမိတက်ရောက်ခွင့်ရှိသည့် အစည်းအဝေးများ၊ ဆွေးနွေးပွဲများကို မပျက်မကွက် မှန်မှန်တက်ရောက် လုပ်ကိုင်နိုင်ရမည်။